Mar 2:13-22 | YomNWM | STEP | Yesu wuyenda diaka ayi wudiata mu mbembele mbu, nkangu wu batu wuyiza ku kaba ayi wuba longa.

Mark 2:13-22

Bafindisa Yesu ziphaka

(Matayi 9.9-13 ; Luka 5.27-32)

13 Yesu wuyenda diaka ayi wudiata mu mbembele mbu, nkangu wu batu wuyiza ku kaba ayi wuba longa. 14 Bu kaba vioka, wumona Levi, muana Alafayi, vuendi mu bilu kiba mfutisilanga ziphaku ayi wunkamba :

—Wundandakana. Niandi wutelama ayi wunlandakana.

15 Yesu bu kaba dia ku nzo Levi ; mimfutisi mi ziphaku miwombo ayi bankua masumu bawombo badia yandi va kimosi ayi minlonguki miandi ; bila batu bawombo banlandakana.

16 Minlongi mi mina mi Bafalisi bu mimona ti Yesu wulembo dia va kimosi ayi mimfutisi mi zipaku ayi bankua masumu, mieka nyuvula minlonguki mi Yesu :

—Bila mbi Nlongi eno kalembo dila va kimosi ayi mimfutisi mi ziphaku ayi bankua masumu e ?

17 Yesu bu kawa bobo, buna wuba vutudila :

—Batu badi buvini basi mfunu wu munganga ko, vayi badi kimbevo bawu bantombanga munganga ! Ndisia kuiza ko mu tela basonga vayi ndiyiza mu tela bankua masumu.

(Matayi 9.14-17 ; Luka 5.33-39)

18 Minlonguki mi Yowani ayi Bafalisi baba kukifuisanga nzala mudiambu di lusambulu. Buna bayiza yuvula Yesu :

—Bila mbi minlonguki mi Yowani ayi mi Bafalisi beti kukifuisila nzala mu diambu di lusambulu vayi minlonguki miaku mikifuisanga nzala ko mu diambu di lusambulu e ?

19 Yesu wuba vutudila :

—Buevi ; batu batumusu ku nyengo makuela balenda kukifuisa nzala mu diambu di lusambulu bu bakidi va kimosi ayi mutu wowo kuedidi e ? Mutu wowo sadisidi nyengo bu kadi yawu va kimosi, balendi kifuisa nzala mu diambu di lusambulu ko. 20 Vayi vela ba lumbu, bu bela ku babotula mutu wowo kuedidi bunabosi bela kifuisa nzala mu diambu di lusambulu.

21 Mutu kalendi bonga tendi kimona ko muingi kalondila nledi wukhulu. Niandi vanga bobo buna kimona kieka buela kakuna nledi wukhulu ayi buna divudu diela ba dinneni. 22 Bobuawu mutu kalendi tula ko vinu kimona mu zitsaku zikhulu ^{▼▼Zitsaku zikhulu : bana ba Iseli baba kifu ki lundilanga vinu mu zitsaku zivangulu mu minkanda mi bibulu vayi mu nkanda wu khombo baba luta vangilanga ziawu.} bila vinu kimona kibeki bu kanzunina zitsaku zioso. Buna vinu kibungani ayi zitsaku zifuidi. Vayi beti lundila vinu kimona mu zitsaku zimona.